二十二連勝！香港拳擊明星「神奇之子」曹星如第二回合打到左眼腫脹，捱至第六回合更被醫生判定不能作賽，但最終都以累計點數68：66打敗日本強手日本前世界冠軍河野公平！但你又知唔知道二十二連勝背後嘅曹星如係點樣成長呢？
(圖片來自HK01)
Rex自細就喺拳擊世家中長大，父親同哥哥都係拳手，Rex亦順理成章喺12歲開始學習拳擊，但拳擊路上亦唔係一帆風順，畢竟香港要走拳擊這條路，總會被人潑冷水，搵唔到認同感。Rex同一般香港青少年都一樣，細細個亦都有被打機、其他運動令佢失去重心，訓練時仲成日「偷雞」，無書讀之後仲去咗搬貨、跟車等工作！拳擊路？睇嚟越行越遠啦~
(圖片來自HK01)
但去到Rex 成年，有朋友邀請擔任助教，Rex先真真正正知道自己要走嘅路，除咗重新發奮圖強打好拳外，仲頻頻學好英文，為咩？咪為咗教外籍拳手囉！如事者，Rex就日復日復練拳，更喺拳擊搵到自我認同，儘管途中被多人潑冷水，畀人笑做「爆軚如」，「打拳搵唔到食架」，去到24歲Rex都係把心一橫，堅持自己，投身職業運動員行列。
(圖片來自HK01)
每日跑一跑步，做一做健身對一般香港打工仔嚟講已經係體能上一大負擔，但身為職業拳擊手嘅Rex 更加要每日花上4-6小時訓練！除了訓練，Rex仲要面對眾多比賽，更要喺訓練、比賽同養傷之間搵到平衡點，當中嘅辛酸唔係一般人能夠體會！
(圖片來自阿波羅網)
一路嘅堅持令Rex慢慢建立自己嘅名氣，由第一勝到第二第三，去到二十二連勝，由第一場比賽得300人睇，到今日全港為佢打氣，一步一步，Rex都係要求自己做到最好。就算世界每一個人都向佢指指點點潑冷水，Rex都一直堅持自己嘅路，甚至登上超蠅量級拳手第一位，亦係第一個香港拳手做到如此令人引以為傲嘅成績。
22連勝，13直接KO。懂得堅持，先係香港人。
(圖片來自HK01)
